Ituloy ang Laban

ITULOY ANG LABAN
Titik at Himig ni: Allison "Ariel" Opaon
Instrumentalista: Noel Cabangon para sa gitara (acoustic)
Umawit: Teatro Pabrika


Mapula na ang dakong silangan
Sinag ng araw ang matatanaw
Magwawakas na ang kapangyarihan
Ng mapang-aping dayuhan.


Ituloy mo ang laban hanggang magtagumpay
Ang kalayaan mo'y nasa iyong kamay
Kapakanan ng bayan ang ipaglaban
Tigreng bandila'y ibagsak nang tuluyan.


Koro:
Ganap na demokrasya ang mangingibabaw
Tunay na kasarinlan ang makakamtan
Walang pagsasamantala
Sa lahat ng dako ng bansa.


(Ulitin ang 2 saknong)


Tigreng bandila'y ibagsak nang tuluyan.

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Lipunang Makatao

LIPUNANG MAKATAO

Nagwagi sa unang gantimpala sa timpalak sa awit na pinamahalaan ng Center for Trade Union and Human Rights (CTUHR)

Titik ni: Resty Domingo

Himig nina: Mar Laguna, Bobet Mendoza, Joey Asidera, at Elena Cruz

Instrumentalista: Noel Cabangon para sa gitara (nylon, steel), synthesizer, (strings); Angelo Villegas para sa gitara (bass); at Rene Santos para sa drum set

Umawit: Razel Amisola (solo); Teatro Pabrika (koro)

Solo:

Luha'y dumadaloy sa mugto mong mga mata

Larawan mo'y kalungkutan at kawalan ng pag-asa

Magagandang pangarap sa buhay mo'y di makita

Nabubuhay ka sa panahong mapagsamantala.

Koro:

Gumising ka, kaibigan, ang isip mo'y buksan

Dapat mong tuklasin ang tunay na kadahilanan

Bakit may naghihirap na gaya mo sa lipunan

At sa dako roo'y hanapin ang kasagutan.

Tama ka, kaibigan, sila nga ang dahilan

Ang mapagsamantalang uri sa lipunan

Likhang yaman natin, sila ang nangangamkam

Na dapat mapasaatin at sa buong sambayanan.

Koro:

Tumindig ka, kaibigan, tayo nang magpasya

Panahon nang wakasan ang pagsasamantala

Sa diwa ng layunin tayo'y magkaisa

Lipunang makatao'y itindig ng buong sigla

Buong Sigla.

(Instrumental)

(Acapela ng koro)

(Ulitin ang koro kasama ng instrumento)

Tumindig ka, kaibigan, tayo nang magpasya.

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Tandaan Mo, Mahal Kita, Kasama Ko

TANDAAN MO, MAHAL KITA, KASAMA KO

Titik at Himig ni: Allison "Ariel" Opaon

Instrumentalista: Allison "Ariel" Opaon para sa gitara (nylon); Mar Laguna para sa gitara (steel-lead); at Noel Cabangon para sa gitara (string)

Umawit: Allison "Ariel" Opaon

Sa mahabang panahong nakalipas

Matinding hirap at gutom dinanas

Ngunit nanatiling magkakapit-bisig

Hinarap ang panunupil at pang-uusig.

Masakit isiping tayo'y magkawalay

Pakikibaka'y malapit nang magtagumpay

Sa nakaraan tayo'y dukha't salat

Pagkain na kaunti pinagsaluhan ng lahat.

Koro:

Kabahagi ka na sa puso ko, oh, kasama

Kasaysayan ko sa buhay, ikaw'y napabilang na

Di ko mapigilan ang luha'y papatak

Ngunit mapipigilan ko ang aking pag-iyak.

Sa oras na tayo'y magkakalayo

May dako pa kayang tayo'y magkatagpo

Hindi ka kaya mag-iiba o magbabago

Tandaan mo, mahal kita, kasama ko.

(Ulitin ang koro)

Paalam, paalam na sa iyo

Tandaan mong mahal kita,

Mahal kita, kasama ko

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Tao Ako, Karapatan Ko

TAO AKO, KARAPATAN KO

Titik at Himig ni: Allison "Ariel" Opaon

Instrumentalista: Bobet Mendoza para sa gitara (nylon); at Noel Cabangon para sa gitara (steel)

Umawit: Teatro Pabrika

Sapul nang ako'y mamulat ay aking nakikita

Maitim na ulap sa paligid ko naglipana

Mala-basahang mga bata, mamamayang dukha

Kinitil na kalayaan sa matang may luha.

Magsasaka, inaaping uri sa lipunan

Inagaw ang lupa ng sakim na iilan

Hiling mo'y makataong kalagayan

Lupang taniman, hindi lupang libingan.

Koro:

Bala, pandarahas, pananakot nakamit

Kamay na bakal nakatutok handang kumalabit

Dugo sa lupa uusig sa mapagsamantala

Hindi titigil ang bayan hanggang walang laya.

Sa kanang kamay hawak ay maso

Panday ka ng lipunan at lahing Pilipino

Hiling mo'y lipunang makatao

Ngunit ang kasagutan nila'y nagbabagang punglo.

Tao ako, karapatan ko, 'wag mong agawin

Sisiklab ang poot ng dibdib di mapipigil

Karapatan, karapatan bilang tao

Igalang mo nang tumahimik itong mundo.

(Ulitin ang koro, simula sa "Pandarahas")

Dugo sa lupa uusig sa mapagsamantala

Hindi titigil ang bayan hanggang walang laya.

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Welgang Bahay, Welgang Bayan

WELGANG BAHAY, WELGANG BAYAN
Titik nina: Oscar Roman at Mar Laguna
Himig ni: Mar Laguna
Instrumentalista: Noel Cabangon para sa gitara (steel-lead, steel-rhythm); at Gary Granada para sa gitara (nylon rhythm), sythesizer
Umawit: Nancy Belmonte


Sa bawat pagkilos, magsama-sama tayo
Sa bawat bigkis, magtatagumpay tayo
Lakas nati'y di biro, di kayang ibuwal
Pare ko, 'yan ba'y totoo?


May ilang kasama, magaling sa salita
Kapag may kahilingan, kasama sa biyaya
Kapag may paghihirap, unang nawawala
Pare ko, 'yan ba'y totoo?


Koro:
Welgang bahay, welgang bayan
Nasaan ka puro ka lang dada
Ang sabi mo noon, ikaw'y aming kasama
Ngawa ka ng ngawa, kulang ka naman sa gawa.


Welgang bahay, welgang bayan
Nasaan ka, puro ka lang porma
Welgang bahay, o welgang bayan
Pare ko, 'yan ba'y totoo?


Adlib
(Ulitin ang koro at III saknong)


Pare ko, alin kaya ang tama?

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Sweet na Sweet

SWEET NA SWEET

Titik at Himig nina: Mar Laguna at Leo Chavez

Instrumentalista: Noel Cabangon para sa lahat ng gitara at synthesizer (tambourine, cymbals, bonggos); at Rey Arsulo para sa marakas

Umawit: Connie dela Cruz at Allison "Ariel" Opaon

Binata:

Kaytagal ko nang nanunuyo sa mahal kong sinasamba

Araw-gabi iniisip, gusto'y laging nakikita.

Dalaga:

Sa isip ko'y walang-wala ang salitang pagsinta

Gusto ko'y laging mag-overtime para ako magkapera.

Binata:

Paano naman ang puso kong tinatambol ng pag-ibig

Sulyap dito, sulyap doon, sa pisngi mo nakatitig

Nangangarap, umaasam tayong dalawa'y magsing-ibig

Pati unan gutay-gutay sa umaga pagkagising.

Dalaga:

Ikaw ba'y may pera na't ako'y iyong pinipili

Pambili nga ng sigarilyo'y nanghihingi ka pa ng diyes.

Binata:

Handa ako na kumayod, pati hweteng papasukin

Upang pera'y makalikom saka kita hihimukin

Sabay halik sa pisngi mong parang manggang manibalang

Kagatin mo't di kagatin, tutulo ang iyong laway.

Dueto:

Ngayon kami'y magsyota na

Very loving at sweet na sweet

Kaya lang ay may problemang

Di namin maiwaglit

Paano kung makasal nang saka kami magkapaslit

Makakain ba ng anak ang salitang "sweet na sweet"

Maghahanda muna kami saka kami manglilingkis

Maghahanda muna kami saka kami manglilingkis

Nang "sweet na sweet".

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Paraisong Rehas

PARAISONG REHAS
Titik nina: Mar Laguna, Bobet Mendoza, Joey Asidera, Nancy Asidera, Doray Mendoza, at Oscar Roman
Himig nina: Mar Laguna at Bobet Mendoza
Instrumentalista: Noel Cabangon para sa gitara (nylon, rhythm) at synthesizer (windbells); at Mar Laguna para sa gitara (acoustic-steel)
Umawit: Teatro Pabrika


Kalikasan ng mundo nilikha para sa tao
Sariwa ang hanging iyong masasamyo
Malaya ang mga ibong masasayang nag-aawitan
Sa luntiang kagubatan sila'y naninirahan.


Mayamang kalikasan tila maglalaho na
Hanging malalanghap ngayo'y may lason na
Wala na ang himig ng mga ibong nag-aawitan
Sa kalbong kagubatan na siyang pinamumugaran.


Koro:
Dating paraiso bakit ngayo'y may rehas na
May paghahari at pagsasamantala
Halos itong mundo'y sirain na.


Kaya ngayon tayo ay gutom na nilalang
Na binubusog ng kasinungalingan
Naghahanap ng kapayapaan at katarungan
Na ipinagkait ng sakim na iilan.


Nasaan ang daang maghahatid sa atin
Sa iisang landas ng simulain
Upang tubusin ang hirap na taglay natin
At upang paraiso'y muling mapasaatin.


(Ulitin ang koro)
Paraiso natin ngayo'y nasaan na
Hmmmmmmm...

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Makauring Kamalayan

MAKAURING KAMALAYAN

Titik at Himig ni: Allison "Ariel" Opaon

Instrumentalista: Bobet Mendoza para sa gitara (nylon); Noel Cabangon para sa gitara (steel, bass) at synthesizer (koto tremolo); Rey Arsulo para sa marakas; at Mar Laguna para sa gitara (steel)

Umawit: Teatro Pabrika

Ikaw at ako'y may adhikain

Na ang sambayana'y pag-isahin

Upang higit na maisusulong

Ang kalayaan na nilalayon.

Higit mong panghawakan

Ang iyong karapatan

Patatagin ang iyong isipan

Itindig ang sambayanang luhaan.

(Isulong ang sambayanang lumalaban.)

Koro:

Linangin ang makauring kamalayan

Tungo sa maunlad na lipunan

Ito'y mabisang sandata, kasama

Para sa ating paglaya.

(Ulitin ang 1 at 2 saknong, 2x koro)

Tulay:

Para sa ating paglaya.

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Pag-ibig at Pagsuyo

PAG-IBIG AT PAGSUYO
Titik nina: Bobet Mendoza at Joey Asidera
Himig ni: Bobet Mendoza
Instrumentalista: Bobet Mendoza para sa gitara (nylon): Mar Laguna para sa gitara (steel); at Noel Cabangon para sa synthesizer (pan flute, bass-violin)
Umawit: Razel Jamizola at Joey Asidera


Babae: 
Masdan mo ang paglubog ng araw
Tila ba unti-unting pumapanaw
At wari'y hindi na muling matatanaw.


Babae:
Gabi'y darating ang oras ay lilipas
Balisa ang isip sa pagdating ng bukas
Umaasang liwanag ay muling mamalas.


Koro - Dueto:
Ganyan ang ating pag-ibig at pagsuyo
Na hindi kaylanman mapapasuko
Kung tayo man ay magkakalayo
Layunin at damdamin hindi maglalaho.


Lalaki:
Subalit kung sa ati'y mailap ang bukas
Ang pag-ibig natin ay hindi kukupas
Tulad ng titis pilit magniningas.


Lalaki:
Kasabay ng buwan at bituin sa langit
Magsasaboy ng liwanag sa gabing tahimik
Upang bukas ay may umagang sasapit.


Ulitin ang koro
Kung tayo man ay magkakalayo
Layunin at damdamin ay hindi maglalaho


Tulay:
Pag-ibig at pagsuyo di maglalaho.

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Salamat, Karanasan

SALAMAT, KARANASAN

Titik at Himig ni: Allison "Ariel" Opaon

Instrumentalista: Bobet Mendoza para sa gitara (nylon); Allison "Ariel" Opaon para sa gitara (steel-rhythm); at Noel Cabangon para sa gitara (steel-acoustic)

Umawit: Teatro Pabrika

Dagdag na salaysay: Allison "Ariel" Opaon at Evelyn Tila

Hindi na mabibilang ang hirap na dinanas

Sa lamig ng gabi, sa ulan na pumapatak

Kumakalam na sikmura napagtiisan

Ang lahat ng mga ito'y napagtagumpayan.

Koro: 

Salamat, maraming salamat, kababayan

Sa aming paghihirap kayo'y kaagapay

Salamat din sa nasabing karanasan

Natuto kami na manindigan.

(Dagdag na salaysay na nagpapaliwanag sa dahilan at layunin ng Haranang Bayan)

Hindi pa mababatid kung kailan matatapos

Ang paghihirap namin dito sa piketlayn

Ngunit kami ay hindi manlulupaypay

Hanggang sa aming makamit ang tagumpay.

(Ulitin ang koro ng dalawang beses)

(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Haranang Bayan

HARANANG BAYAN

Titik nina: Bobet Mendoza, Mar Laguna, Ojie Santos at Oscar Roman

Himig nina: Mar Laguna, Joey Asidera, at Bobet Mendoza

Instrumentalista: Bobet Mendoza para sa gitara (nylon); at Noel Cabangon para sa gitara (steel, lead), kubing, tongatong, synthesizer (drums) at plauta

Umawit: Evelyn Tila; at Allison "Ariel" Opaon; Teatro Pabrika (koro)

Solo:

Kami sa maghapon ang pawis ay tumutulo

Sa katawan at bisig kadalasa'y natutuyo

Bawat isa sa atin ay di nagkakalayo

Gutom at hirap ating natatamo.

Solo:

Sa tinakbo ng kasaysayan

Marahil ay alam mo na

Bayan na sinasabing mayroong demokrasya

Ang katotohanan ay dapat na nating makita

Sa haranang ito sana ay madama.

Dueto:

Awit namin ay dinggin

At inyong bigyang pansin

Ito'y para sa amin, sa kanila at sa inyo rin

Solo:

Awit ng ating buhay

Mula noon hanggang ngayon

Halina't samahan

Huwag sayangin ang panahon.

Koro:

Ang mga awiting sa inyo ay aming alay

Awit ng pag-ibig at ng aming buhay

Ng pakikibaka ng sambayanan

Tungo sa ating minimithing kalayaan.

Haranang Bayan ang tanging gamit

Sana'y maging aral ng mithii'y makamit

Sa tulog na isipan at matang nakapikit

Sana'y maging daan sa kalayaang laging sambit.

Masarap damhin kung tayo ay sama-sama

Sa anumang larangan, antas ng pakikibaka

Sa paraang ito ng gawaing pangkultura

Ambag sa pagbabago, tayong lahat magkaisa

Ambag sa pagbabago, tayong lahat magkaisa.

Haranang Bayan!




(Sinipi ang awit na ito mula sa cover ng cassette tape album na pinamagatang "Haranang Bayan", na inihandog ng Teatro Pabrika sa pakikipagtulungan ng Philippine Educational Theater Association (PETA), na inilunsad noong mga unang bahagi ng 1990s.)

Paliwanag mula sa album na pinamagatang Haranang Bayan:

HARANANG BAYAN

Isang nakagawiang paraan ng mga manggagawa sa pagpapalaganap at pagpapahayag ng mga problemang kanilang kinakaharap sa loob at labas ng pagawaan ay sa pamamagitan ng mga awitin, ang "Haranang Bayan". Ito'y pananapatang kinapapalooban ng mga makauring awitin at mga orihinal na komposisyon ng mga manggagawa. Layunin din nito ang paghingi ng tulong pinansyal at materyal sa mga bahay-bahay, sa komunidad, mga institusyon at iba pang mga samahan upang matugunan ang mga gastusin sa panahon ng paghahanda sa isang pagkilos, laluna sa panahong ang mga manggagawa ay nasa piketlayn. Batay sa karanasang ito, isang mabisang paraan din ng pagpapalaganap ng kulturang manggagawa ang Haranang Bayan.

Ang Teatro Pabrika ay samahan ng mga grupo at manggagawang pangkultura na nagmumula sa iba't ibang pagawaan. Ito ang tumatayong sentrong samahan ng mga manggagawang pangkultura sa National Capital Region at Rizal (NCRR).